Weihnachtskarte 2019

Nachdem unsere engsten Freunde unsere selbstgebastelten Karten erhalten haben, kann ich diese nun hier zeigen.

Es ist immer eine Gemeinschaftsarbeit mit meinem Mann. Nein, er hat das Glöggli nicht gehäkelt 😁aber mein Mann hat die Sterne aufgeklebt und vorallem er schreibt jedes Jahr ein Gedicht. Es ist in Schweizerdeutsch geschrieben, hoffentlich versteht ihr doch etwas davon.

Die Glocken Häkelanleitung hab ich in einem uralten Heft Filet häkeln Lea Sonderheft gefunden und für meine Grösse abgeändert. Da ich bereits im September mit dem Häkeln angefangen habe, war ich rechtzeitig für die Adventszeit fertig. Es sind 21 Stück. Die "Haarlocke" ist aus Sisal.

E Mäitlilogge

  

Es Glöggli hängt im Kircheturm

bi Wind und Wätter und au Sturm,

abunde mit enere blonde Logge

grad unter dr grosse Kircheglogge.

Weich wie Syyde eifach wunderbar

die Logge isch us Mäitlihaar.

Worum die do im Kirchturm hängt

wird immer drüber nochedänkt.

Letscht Joor vor Wiehnachte emole

isch dr Babbe in Käller e Kischte go hole.

Dr Schmuck für dr Chrischtbaum und für d Krippe

gschmückt wird no nach alter Väter Sitte.

Wiehnachtsschmuck von ere Mänge Generation

das isch e wunderschöni Tradition.

D Chugele, d Glöggli und au dr Stärn,

sind zwor nümme so ganz modärn.

Bim Uspacke kriegt d Mamme e Schregge,

am Stärn fählt eine vo sine Egge.

Au es paar Chugele hän kleini Chritz

e neue Schmuck muess ane ohni Witz.

Zobe seit d Mamme,“ los emol Maa,

mir mien e neue Wiehnachtsschmuck ha.

Morn am Morge gang ich grad,

zum Lidl oder zum Aldi in d Stadt.“

Dört gits für 19 Frangge es ganzes Pack

drzue bekunsch gratis no e Gebühreabfallsack.

Drmitt kasch ohni grossi Sorge

dr alti Wiehnachtsschmuck entsorge.

Am nägschte Tag am Morge scho

hän si dä Gratissack denn füüre gno.

Die ganze alte Wiehnachtssache

mien jetzt für neui Platz halt mache.

D Mamme und dr Bappe sind ganz stolz

dr neui Schmuck isch nit us Glas oder Holz.

Nei! Schön glänzig us Plastik, gmacht in China

das passt ganz in die Zyt, jo das isch prima.

Dr alti Schmuck kunnt in Chüübel vor em Huus,

wägg mit dr Tradition, es isch e Gruus.

Mängi Wiehnacht het dr Schmuck mit dr Familie erläbt,

jetzt sehts so us, dass es keini wyteri für ihn gäbt.

Wo s Töchterli vo dr Schuel isch ko, o Schrecke,

was het sie miesse im Mischtkübel entdecke.

Alli schöne Erinnerigge sind im Abfall do,

unter Träne cha sie das nit verstoh.

Ohni Znacht isch si denn ins Bett

will si kei Appetit me het.

Die alte Glöggli, Chugele und dr Stärn

all das het sie halt so gärn

Scho bald isch dr Heilig Obe cho

die ganzi Familie wot in d Kirche go.

Zur Mitternachtsmäss go fiere wie alli Joor,

wieso fählt am Töchterli es Strähnli im Hoor?

Het sie das viellicht abgschnitte für ihre Schatz?

Wo hett das Strähnli jetzt ächtsch si Platz?

Nur s Mäitli weiss es, die mit de schöne Logge

was im Kirchturm hängt unter dr grosse Glogge.

D Chirchturmglogge lütet gli.

Es isch no still, doch das isch gli verbi.

S chleine Glöggli freut sich scho,

will es uf Wiehnacht es Gschänggli het becho.

Es dörf lüte mit dr Glogge, die wo oobe an ihre hängt.

Das isch für s Glöggli s schönschte Wiehnachtsgschängg.

Vergässe isch jetzt all dä Schmärz,

das goht im Glöggli tief ins Härz.

Es isch so glücklich und so froh

für dä heiligi Obe do,

für das schöne Plätzli im Kircheturm

sicher gschützt vor Wind und Sturm.

Uf em Heimwääg lauft d Familie durch dr Wald,

in dere Nacht isch es bitterkalt.

Es isch dr Wunsch vom Mäitli gsi,

sie lauft de Eltere es paar Schritt hindedri.

Plötzlich bliebe d Eltere stoo

wie agwurzlet, si chönne nüm witergoo,

was si do gsehn isch wohl Zauberei,

do hängt dr ganz alt Wiehnachtsschmuck vo dehei.

Dä Schmuck wo sie in Abfall hänt tue,

hängt do an de Tännli und het gfunde si Rue.

Dr Schmuck ziert die Bäumli mit so viel stolz,

es isch Wiehnacht bi de Tännli im Unterholz.

Wär sie gschmückt het das het niemerts gseh.

Isch es ächt es Ängeli gsi oder e Zauberfee?

An de Bäumli hänge Ängelshoor wie blondi Logge

und a eim Baum e chlini Christbaumglogge.