.jpg)
.jpg)
Unsere Verwandten, Freunde und Bekannte bekommen in diesem Jahr eine Weihnachtskarte mit einem gestrickten Engel. Man kann den Engel als Eierwärmer, Tannenbaumschmuck oder einfach als Deko verwenden.
Ich habe insgesamt 22 Engel gestrickt. Die Strickanleitung ist von drops.
Wie immer hat mein Mann ein Gedicht dazu geschrieben. Es ist in Schweizerdeutsch geschrieben, Rechtschreibe Fehler sind vorprogramiert.
Dr Wiehnachtsängel
E Ängel fliegt uf d Wiehnachtsreis
am Himmel dreiht er Spirale und Chreis
die Flugshow, wo er zeigt die isch Famos
den d Vorfreud uf die Reis isch gross
Er fliegt an e besinnlichs Wiehnachtsfescht
mit sine Fründe und ganz viele Gescht
dr Wäg zeige ihm tusigi vo Stärne
anenandergreiht wie Strosselatärne
S Ziel isch wie immer dr grossi Stärn
wo me lüchte seht vo noch und färn
mit jedem Flügelschlag gniesst dr Ängel si Flug
er gleitet so sanft wie imene Vogelzug
E seht unter sich e wunderschöns Land
mit grüene Fälder und Bärge im e wisse Gwand
so blau wie e Saphir sind d Flüss und dr See
so schön isch das in dr Obedämmerig zgseh
Vor luter stune und luege vergisst er Zyt
so langsam wie er jetzt fliegt chunt er nümm wit
d Sunne goht scho unter und Näbel zieht uf
au grossi dunkli Wolke hets no obedruf
Die tusig Stärnli seht er au nümme guet
langsam aber sicher verloht ihn dr Muet
e Landeplatz finde isch do aber schwer
und lande im Dunkle no viel mehr
Es isch alles voll Hügel und niene flach
under ihm fliesst au no e grosse Bach
es lüchtet aber öppis am Bode unde
het er ächt do e Flugplatz gfunde
Er fliegt obeabe aber o herrje
die Tanne het er z spot gseh
au dr Stärn am Tannespitz isch ihm entgange
jetzt bliebt er au no mit eme Flügel dra hange
Was isch do obe los, frogt e Stimm in dr Nacht
ich bi e Ängel ich ha do e Notlandig gmacht
e Ängel in minere Tanne das isch dr Bescht
du passisch grad zu unserem Wiehnachtsfescht
I bi dr Josef, aber sie dien mir Seppi sage
und mini Frau Mia würdi dr Name Maria trage
unser Buschi, wo leider noni lauft,
hän mir uf dr Name Owi tauft
Wo bi i denn do glandet, frogt dr Ängel
du bisch do uf dr Alp Heublumestängel
O, seit dr Ängel, das freut mi aber sehr
zeig mir doch bitte vo euere Alp no mehr
Wenn du abe chunsch zeig ich dir die ganzi Alp
dr Hund, dr Esel, dr Stier und s Chalb
Dr Ängel rieft: vorsicht ich chume jetzt
göhnd alli wäg, so dass sich niemerts verletzt
Er loht sich falle und d Landig isch glunge
aber dr Seppi isch schnäll uf d Siete gsprunge
me weiss jo nie wenn so Ängel abe fliege
chönt me no e Flügel an d Ohre kriege
S isch alles guet gange und niemer verletzt
jetzt hän sich dr Seppi und dr Ängel uf e Bode gsetzt
also Ängel ich lad di fierlich y
du sölsch unsere Gascht hüt Zobe si
Danke, i muess aber no mine Flügel putze
und es paar kaputtigi Fädere stutze
au Tannenodle us Ohre und Hoor useläse
I seh jo us wie e alte Häxebäse
S Harz an de Händ muess au ewäg
und unter de Fingernegel dr Dräck
e bitzeli Körperpfleg mues halt scho si
doch denn bi i liebend gärn bi Euch drbi
Si träffe sich im Stall zum Znacht
wo scho dr Owi in dr Krippe lacht
dr Esel, dr Ochs, und au d Chue
luege gspannt däm Triebe zue
Es ertöne Stimme am noche Felseband
es sind die drey Greise us em Oberland
si bringe alli Johr Gschänkli verbi
es het meischtens au Wiehnachtsgutzi derby
Doch wo si ine chömme seht me scho
Gutzi wird me an däm Obe nit becho
denn dr Buur vom Heimetli schöne Fläck
chunt mit ere Site gräucherete Späck
Dr Senn vom steile Maiesäs
bringt vo sine Geise e grosse Laib Chäs
und dr Schofhirt Jeremias Fürscht
het als Gschänk öppe fufzig Trochewürscht
An dr Tür stoht au no em Owi si Hebamme
Die bringt e saftige Buurehamme
jetzt stoose alli a zum Wohl
uf das gemeinsame Obemohl
Us dr Chuchi chunt mit e me liebe Gruess
e Platte Älplermagrone mit Öpfelmues
zum Trinke gits e Chrueg Bieremoscht
passend zu jedere Älplerchoscht
Nach em gniesse vo Spies und Trank
gits no es Bätzi us em Schnäpslischrank
dr Ängel luegt das Chindli in dr Krippe a
so härzig wie es z friede lache ka
Es strahlt Freud und Zfriedeheit us
in däm vo viel Liebi erfüllte Hus
behüetet vo alle wo in sinnere Nöchi sind
das isch bestimmt es Wunderchind
Die drey Greise stimme jetzt es Liedli a
wo an sonere Wiehnacht nit fähle ka
überglücklich und e bitzeli mied
singe alli jetzt das Wiehnachtslied
Stille Nacht was für eine Pracht
ein Kindlein wurde uns gebracht
geboren in einem schönen Land
wo stehts Friede das Volk verband
Das Paradies auf dieser Welt
nicht käuflich, mit keinem Geld
das Kindlein wird hier viel Liebe erleben
die Liebe dann auch weitergeben
Das Feschtli isch jetzt bald verbi
es hät nit chönne schöner si
dr Ängel seit ich muess jetzt leider go
ich hoff ihr chönnet das verstoh
ich flieg zu alle Mensche uf dere Erde
sie sölle die Botschaft verstoh und glücklich wärde
Verlinkung, Firmennennung ohne Auftrag und Entgeld
